Beth yw Deddf VAWDASV?
Mae Deddf Trais yn erbyn Menywod, Cam-drin Domestig a Thrais Rhywiol (Cymru) 2014 yn gyfraith nodedig, y cyntaf o’i bath yn y DU. Diben y Ddeddf hon yw darparu:
- Trefniadau ar gyfer atal trais yn seiliedig ar ryw, cam-drin domestig a thrais rhywiol.
- Trefniadau ar gyfer amddiffyn dioddefwyr trais yn seiliedig ar ryw, cam-drin domestig, a thrais rhywiol.
- Cefnogaeth i bobl sydd wedi’u heffeithio gan drais yn seiliedig ar ryw, cam-drin domestig a thrais rhywiol.
- Fframwaith Hyfforddi Cenedlaethol
- Dyletswydd ar Weinidogion Cymru i gyhoeddi a gweithredu strategaeth genedlaethol ar gyfer mynd i’r afael â thrais yn erbyn menywod, a dyletswydd ar awdurdodau lleol i lunio a gweithredu strategaethau lleol.
Beth yw'r Fframwaith Hyfforddi Cenedlaethol?
Y cyntaf o’i fath yn y Deyrnas Unedig, bydd ein Fframwaith Hyfforddi Cenedlaethol yn cynnig hyfforddiant cymesur i gryfhau’r ymateb a ddarperir ledled Cymru i’r rhai sy’n profi VAWDASV. Bydd yn gwneud hyn o fewn cyd-destun cenedlaethol sy’n sicrhau ansawdd yr hyfforddiant, a bod yr arfer proffesiynol gofynnol yn cael ei safoni. Bydd hyn yn sicrhau, ni waeth ble mae goroeswr yn cael mynediad i wasanaethau yng Nghymru, fod yr ymateb proffesiynol a gânt yn gyson ragorol.
Sut mae Grŵp 6 yn cyd-fynd â'r Fframwaith Hyfforddi Cenedlaethol?
Mae Fframwaith Hyfforddi Cenedlaethol wedi’i ffurfio o chwe grŵp a maes llafur pwnc arbenigol. Er bod rhywfaint o ddilyniant o fewn y Fframwaith, yn gyffredinol mae pob rhan ohono’n ymwneud â grŵp penodol o broffesiynau a fydd, ar ôl hyfforddiant, yn rhan o weithlu sy’n gweithio tuag at nod cyfunol; gwella’r ymateb i’r rhai sydd wedi profi VAWDASV.
Grŵp 1: Mae gweithwyr y Gwasanaeth Cyhoeddus yn cwblhau cwrs e-ddysgu i gynyddu eu dealltwriaeth o Drais yn erbyn Menywod, Cam-drin Domestig a Thrais Rhywiol a chynyddu eu hyder i nodi arwyddion trais a cham-drin posibl ac i gyfeirio cydweithwyr, ffrindiau a theulu at wasanaethau arbenigol.
Grŵp 2: Darperir hyfforddiant Gofyn a Gweithredu i staff gwasanaethau cyhoeddus sydd fwyaf tebygol o fod mewn cyswllt â’r rhai sy’n profi VAWDASV fel rhan o’u rolau. Prif amcan “Gofyn a Gweithredu” yw galluogi gweithwyr proffesiynol perthnasol i “ofyn” i ddioddefwyr posibl am y posibilrwydd eu bod yn profi cam-drin domestig, trais rhywiol, neu fathau eraill o drais ar sail y rhywiau mewn rhai amgylchiadau ac i “weithredu” fel bod dioddefaint a niwed o ganlyniad i’r trais a’r cam-drin yn cael ei leihau.
Grŵp 3: Bydd gan gyfranogwyr wybodaeth well yn ymwneud â thrais yn erbyn menywod, cam-drin domestig a thrais rhywiol ac yn gallu gweithredu arfer effeithiol i gefnogi cydweithwyr a sicrhau bod pob aelod o deulu sy’n profi trais a cham-drin yn cael cynnig ymyriadau effeithiol. Mae G3 ar gyfer unrhyw weithiwr proffesiynol sydd â chyfrifoldeb arweiniol dros eu proffesiwn o ran trais yn erbyn menywod, cam-drin domestig a thrais rhywiol (e.e. diogelu nyrsys, bydwragedd arbenigol) a hyrwyddwyr yn y gweithle.
Grŵp 4: Cyflwynir Grŵp 4 o’r Fframwaith Hyfforddi Cenedlaethol i’r rhai mewn rolau arbenigol sy’n gweithio’n uniongyrchol a dim ond gyda’r rhai sydd wedi profi VAWDASV. Nod G4 yw sicrhau bod yr holl weithwyr proffesiynol arbenigol yn cael eu hyfforddi’n briodol i sicrhau bod cleientiaid yn gallu cael gafael ar ymarferwyr arbenigol pan fyddant yn ceisio cymorth gan wasanaethau.
Grŵp 5: Mae hyfforddiant ar gyfer grŵp 5 yn galluogi cyfranogwyr i ddeall y prosesau sydd eu hangen i reoli gwasanaeth i’r rhai mae trais yn erbyn menywod, cam-drin domestig a thrais rhywiol yn effeithio arnynt ac i wella perfformiad gweithwyr rheng flaen drwy reolaeth ac arweinyddiaeth gref.
Grŵp 6: Nod Grŵp 6 y Fframwaith yw annog adeiladu tuag at ddiwylliant a seilwaith sy’n darparu cymorth arwain a rheoli i gyflwyno a gweithredu’r cyfeiriad gwybodaeth ac ymarfer o fewn grwpiau 1 i 5. Mae cyflawni i grŵp 6 yn cyfuno Cynllun Ymgysylltu Strategol a adolygwyd yn flynyddol gyda chyfres o ddeunyddiau ategol perthnasol.
